IB 開戶一年 & 2021半年結

 

四蹄踏雪禮服貓，真心cute cute

IB 戶口自2020 年 4 月開始到而家，大話都差唔多有一年多少少。

我會話IB 戶口就好似一個原始人得到部 iPhone 咁樣，成個世界都唔同晒。

本來以前個世界只有港股，到而家港/美/新加坡股，corp bonds，options每樣都有啲。穩陣打現金流每月收錢，收完錢再買新貨，收息又唔收手續費，真心好用。

IB 真心好用，但真心要慢慢試慢慢學。option & margin 係製造現金流嘅利器，識用可以做到「空氣變錢」，唔識用就會好快爆倉。

Btw, IB 收費真心唔低，margin interest, transaction fee, commission, 每月$10 USD月費之類，一年加加埋埋就快夠我買到兩部MacBook Pro。

所謂嘅倉

以前用銀行買股票個時，同一時間hold 5個item 都已經覺得好多，用咗IB之後個倉而家hold 嘅item 有20 - 30隻，成日講笑咁講就快hold 嘅item 數目多過出面街嘅ETF or 銀行賣嘅fund，點解唔走去買盈富 or US index ETF 就算？

因為盈富基金入面有好多垃圾，US index ETF 就太低dividend，唔適合做現金流/用leverage。

開倉個時以ETD/CEF/SG-REITs/US-REITs 為主，曾經講過唔會買tech company，只係focus 收息再投資

去到今年年頭就轉打mixed portfolio，掃走晒啲ETD/SG-REITs，加一堆高息港股/HK-REITs/Giant Tech(AAPL MSFT GOOG)，再加定期short options。But 仍然堅持唔買TSLA，所以有排升到$900都唔關我事。

個倉最大目標就係希望做到 5年唔理佢都唔會有事，5年唔郁佢等佢自動波減槓就係最開心仔嘅事。

點解目標係 5年? 因為真心唔會知黨同國家幾時會特別照顧你。set 個target 5年唔理，堅持唔買垃圾/唔炒賣/唔賭錢，要做到auto-run，我諗應該都差唔多 & ok 合理，唔使怕到時再望個倉，個倉值會變到零。

講回報

QQQ YTD: 15%

VOO YTD: 16%

自己個fund YTD: 20%+

持倉以成個portfolio咁睇，亦會堅持成個fund 整體去睇，執著呢一刻某一隻股票有冇跑贏係冇特別大意思。因為可以係某個sector at this moment 跑輸/贏大市。

所以做active management 嘅重點係要成個fund跑贏所謂嘅「大市」，如果有一日跑唔贏嘅就會乖乖地買index ETF

But 老實講，~20% 係玩crypto 人眼中其實係非常低回報，話晒人地買BTC $29000入，$39000出，一個星期一來一回都30% 回報啦，仲做乜要睇年報同買股票？垃圾！
Hmmm...大概係我仍然相信股票、債券會係未來投資嘅主流，放多少少資金落去坐幾年都唔使太擔心。但如果真心相信crypto 好有未來，其實就應該每月出糧就轉晒去crypto咁至係。不過就真心未聽過有人咁做，亦未見過有人夠膽敢做。

同埋YTD 20%+ 其實真心唔多(特別係散戶大眾眼中)，你當我開倉係 10萬蚊港紙，而家先袋得個2萬蚊港紙。連普通一個打工仔一個月人工都比唔上。學連登仔話齋，「本少，就應該走去搏！」

不過我怕輸錢，我寧願keep 住而家個倉靜靜地每個月收息減槓。

YTD 20%+ 其實都算好滿意架啦，如果以20%計，基本上每4年睇一次奧運會，個倉值就會double，即係大概4年後，個倉嘅「10萬港紙」就會變成「20萬港紙」。不過我相信到時同連登仔講20萬港紙，20%回報都係會俾佢地笑，因為每年只係得4萬蚊港紙落袋。

下半年展望

預期經濟會繼續向好，通漲點都會到，不同類型嘅物價都會升，企業會將佢地嘅product & service 加價。而家個倉有一堆地產收租related items，預期經濟好 -> 佢地會加租 -> end product 物價升。繼續持有&重倉領展(領展真心CLS，全行得佢有能力加租)。預期Giant Tech company 嘅product & service會隨住經濟好而反應係業績之上。

繼續派息 -> 買貨 -> 再派息 -> 再買貨嘅flow

持續投資，持續投資，持續投資(重要嘅事)

經常聽到有種講法，話啲人上一代人好好彩，有03年SARS 樓市大跌，要等股災等樓爆，然後就入市。希望有呢種諗法嘅人會係今年有入市，就算未入，而家入都未算十分遲，話晒肺炎都未真正完晒，係唔係先?