今日想講下職場上嘅心態，關於打工嘅。
想講下「思維控制行為，行為控制結果」呢個諗法。
- 收錢做夠要求本份就算，唔會做多
- 收錢唔做野
- 由公司角度出發，用創業嘅心態去做事
香港大部份嘅都係case 1，少部份係case 2，case 3應該比case 2少。
我覺得3者本身冇對與錯，係在乎個人選擇。
例如case 1，有人覺得我收人$100，就應該付出$100嘅力就算，留返啖氣去hea下仲好，最好就係付出$50嘅力，得到$100。
其實都唔係唔得嘅，不過我相信競爭力係長期練習出黎。
長期咁hea 落去只會得到短期效果，到最尾會死得好慘。
同埋咁樣做事應該好大機會學唔到野，個人唔會有進步。
case 2 就擺明係唔知返工做乜架啦。
case 3 係想講多啲嘅
由創業嘅心態去做事，就係首先要認識份人工係點黎。
每個月份人工就係: 由客收返黎嘅錢 - 成本 - 公司期望嘅profit - 老闆自己要袋嘅profit，最後就係入你袋嘅錢。
同普通打工人諗嘅分別係，普通人認為份人工係
由客收返黎嘅錢 - 成本 就係應該分派嘅薪金，等我拎完分完先至到老闆拎。
打工出糧，天公地道，話知你公司賺錢唔賺錢。
兩個諗法最大分別係，創業心態打工會以滿足公司盈利為首要條件，再以滿足老闆口袋要求為第二條件。
即係將老闆唔當係老闆，而當老闆係客咁嘅心態，盡力要求自己滿足唔同群眾需要之後，先至去提取工作應該有嘅盈利。
咁樣做係有好處，因為打工要成功，首先就係要公司繼續生存，第二就係要老闆繼續生存。
你份工先至有機會繼續做落去。
睇落好似好奴隸心態，但呢個係打工嘅事實。
不過又唔係冇收獲嘅，因為你出嘅力多咗，可以接觸嘅範圍多咗，其實個人會再進步更多。
老闆對你嘅依賴性又會提高，你嘅議價能力又高啲。
到時你想走出黎做又得，係原本公司升職加人工都得。
以創業心態做事，最容易做到嘅，通常都係一啲前線嘅位。
例如經常對客嘅位，因為呢個位係最容易拎住公司嘅資源，去試你想試嘅ideas.
一個人同時負責幾個position 唔係壞事，公司俾資源你，俾埋後勤support你，收住人工咁去試新project，你只需要諗辦法點去serve 個客，點樣link up 公司唔同party，計cost control、order quantity prediction等等，其實係可以當一個小創業嘅訓練。
到有一日有機會出黎做個時，呢啲就會係你嘅優勢。
老實講，何樂而不為？
沒有留言:
張貼留言